Wednesday, May 21, 2008

歐冠不敗之獅、英超霸主~~雙冠王誕生

其實很疲累的我,係早上六時十四分這一刻極應該盡快進入夢鄉才對(小姐!等下還要上班呢!),不過我又再一次忍不住要打開白色小蘋果,記下這一刻,因為係不足一小時前,紅魔完成雙冠王美夢,繼之前衛冕英超冠軍寶座後,再憑12碼擊敗死敵車仔,繼99年後再次捧起歐洲聯賽冠軍盃,同時實現費爵爺賽前要係俄羅斯帶隻盃返屋企既美夢。
好開心,雖然我唔係一個實實在在既紅魔粉絲,但係係英超就最鍾意佢,亦可以話係我最會睇既球隊,26分鐘C朗入個球,我就定左少少架啦,點知跟住迪維斯個球唔入,就心知不妙呀!真係係完半場前俾林伯追和。跟住下半場車仔氣勢之虹,但運就真係靠近紅魔,火爆杜奧巴同林伯個兩球唔入,就覺得似乎紅魔有冠軍相多d(黃生係個人刻係講左句,楣係龍門最佳朋友嚟架嗎!仲有之前一句金句都想記低:波係唔會講大話既,個判罰係啱既話呢,入球係會俾應得個邊既!頂)咁。結果,真係鬥到要互射12碼,先分到勝負。
其實,今仗兩隊邊隊輸都覺得唔抵架啦!打足120分鐘,出盡力呀,個場又咁差,打到每隊都有幾個抽根,交足貨囉。不過,講真啦!C朗射失球12碼,真係勁想伸隻手入去電視到揼佢囉,但係泰利射失個球,勁想幫佢喊呀!勁慘呀!
不過,我覺得車仔今次輸係輸波歴克囉!佢真係名符其實既「二奶命」囉!

*****************************************************

事記篇:人生百態
上星期六,去左一個台灣慈善團體做義工,為四川地震災民向市民募捐。唉!錢我就唔出得幾多啦,唯有出分力啦!
係個短短既唔夠五個鐘時間,我體驗到一樣野,如果我係天使,一定要食人既愛心作維持生命既話,我一定會餓死。我明白,募捐活動進行左差唔多一個時期,可能好多人已經自發咁捐左錢,甚至身體力行去到災區做義工,如果係咪開句聲講句「我捐左啦!」囉,我地仲會講聲多謝,不論佢捐左去邊度,佢都盡左心。
我遇到一對關係應該係夫妻既人,我見到佢哋行過黎望下我同小白手上邊既呼籲版同錢箱,跟住企係我地兩個面前數大銀,我同小白個心都係諗住佢地數完會放d大銀入個錢箱度啦,點知數完佢地行左去喎,你唔捐都算啦,仲乜要企係兩個叫你捐錢既人面前數錢囉?
仲有,好多人會望住我哋笑,我真係好想知佢地笑係咩意思囉,做義工有乜咁好笑呢?叫你捐錢幫災民有幾好笑呀?有d人問完你一輪,之後又係笑一下就行左去,咁又係咩意思呢?
我發現,係個五個多鐘頭入面,老人家同外國遊客都會係主動自發咁行埋黎將錢入落錢箱,有兩個婆婆,係仲之前已經去行捐左,經過見到有人仲為災民籌款,就再捐。
其實我真係明白捐錢依家野,唔係一定要做,亦唔係人做我做,唔做無問題,但係唔做既人唔好俾d人覺得你仲要笑佢地囉,咁樣感覺好差,好似我地為d唔相認、唔相干既災民出分力係白痴行為咁囉!

******************************************************

我覺得我同佢冷卻左落嚟,正確d講係應該係變左我單向先啱,其實可能一直都只係我自己單向,人地根本咩都冇!